Ish-lojtari i Juventusit dhe Bayernit, Douglas Costa, ka ndërprerë kontratën me Sydney FC për shkak të problemeve ligjore në Brazil.
Sulmuesi brazilian u akuzua se nuk kishte paguar mbështetjen financiare për ish-gruan e tij, duke bërë që një gjykatë në Porto Alegre të lëshonte një urdhër arresti.
Sipas mediave braziliane, Costa ka një borxh prej 492,965.29 reais (rreth 78,000 euro), dhe urdhër-arresti është i vlefshëm për dy vite, duke i dhënë çdo autoriteti gjyqësor ose policor të drejtën ta arrestojë atë në çdo kohë. Kjo nuk është hera e parë që ai përballet me probleme të tilla, pasi dy vjet më parë u dënua me 30 ditë burg për një çështje të ngjashme.
Përballë kësaj situate, Sydney FC ka vendosur të ndërpresë kontratën me lojtarin, duke sqaruar:
“Sydney FC ka ndërprerë kontratën e Douglas Costas me pëlqim të ndërsjellë, me lojtarin që nuk mund të udhëtojë për në Australi. Çështjet e vazhdueshme ligjore dhe personale në vendin e tij të lindjes e kanë penguar brazilianin të largohet.”
Douglas Costa ka reaguar duke falënderuar klubin dhe tifozët, pa përmendur problemet ligjore:
“Dua të falënderoj Sydney FC që më dha mundësinë të luaj në Australi: ishte një vit i pabesueshëm me fanellën qiellore. Më vjen keq që nuk mund të kthehem në këtë kohë për shkak të problemeve që duhet të zgjidh në shtëpi, por gjithmonë do ta kujtoj me dashuri kohën time në Sydney. Anëtarëve dhe tifozëve, ju falënderoj nga thellësia e zemrës për mbështetjen që më keni dhënë mua dhe ekipit.”
