Një incident në vendin e punës është raportuar të shtunën në fshatin Shkabaj të Obiliqit, ku një punëtor ka mbetur i lënduar si pasojë e pakujdesisë gjatë punimeve ndërtimore.
Sipas Policisë së Kosovës, i dyshuari, shtetas i Shqipërisë, derisa ishte duke punuar pranë një objekti në ndërtim dhe duke drejtuar një kamion, dyshohet se ka manipuluar në mënyrë të pakontrolluar me vinç. Si pasojë, vinçi është këputur dhe ka rënë, duke e lënduar.
Viktima është dërguar menjëherë për trajtim mjekësor, ndërsa njësitet policore kanë dalë në vendin e ngjarjes për të hetuar rastin. I dyshuari është arrestuar dhe intervistuar nga autoritetet.
Me vendim të prokurorit kompetent, i dyshuari është liruar në procedurë të rregullt, ndërsa hetimet për zbardhjen e plotë të rrethanave të incidentit janë duke vazhduar.
