Çdo lëndë që qëndron në duart apo sirtarët e prokurorëve dhe gjyqtarëve në Kosovë, për pretendime për krime lufte që i takojnë periudhës 1 janar 1998 deri më 31 dhjetor 2000, mund të ndryshojnë institucion.
Ato mund të transferohen në çdo moment në Hagë, te Gjykata Speciale.
Kështu është e definuar në Ligjin për Dhomat e Specializuara.
“Në secilin nivel të sistemit të gjykatave në Kosovë, Dhomat e Specializuara kanë përparësi ndaj të gjitha gjykatave të tjera në Kosovë në lidhje me juridiksionin lëndor të tyre. Dhomat e Specializuara ose Prokurori i Specializuar mund të urdhërojnë transferimin e procedurave dhe hetimeve brenda juridiksionit lëndor të tyre nga ndonjë gjykatë apo prokuror tjetër në territorin e Kosovës tek Dhomat e Specializuara dhe Prokurori i Specializuar”.
Pavarësisht fazës në të cilën ndodhet lënda, sipas avokatit Skënder Musa, ato do të jenë në dispozicion që të transferohen në Speciale në çfarëdo kohe.
Një kërkesë të tillë, veçse e ka bërë gjykatësi i procedurës paraprake.
Lënda në fjalë është trajtuar qysh në vitin 2020, por që u bë publike pas konfirmimit të aktakuzës.
“Më 20 janar 2020, një gjyqtar i vetëm pranoi një kërkesë nga Zyra e Prokurorit të Specializuar (ZPS) që procedurat para një gjykate të Kosovës t’i transferoheshin KSK-së. Megjithatë, më 15 shtator 2022, PSP e njoftoi gjyqtarin e vetëm për vendimin e saj për pushimin e kësaj procedure dhe për të mos dorëzuar aktakuzë për konfirmim. Para se aktakuza të konfirmohet dhe të bëhet publike, procedurat para KSK-së janë konfidenciale. Tani që procedurat janë mbyllur, procesverbalet gjyqësore janë bërë publike”, tha Angela Griep, zëdhënëse e Dhomave të Specializuara të Kosovës.
Megjithatë, identiteti i të akuzuarit dhe veprat penale për të cilat pretendohet se ka përgjegjësi ende nuk janë bërë publike, duke iu nënshtruar redaktimit.
Kronika e gazetares Florijeta Dernjani.