Presidentja e Kosovës, Vjosa Osmani, ka pritur sot në takim të Ngarkuarën me Punë të Shteteve të Bashkuara të Amerikës, Anu Prattipati.
Gjatë këtij takimi është diskutuar për mbarëvajtjen e zgjedhjeve parlamentare dhe përmbushjen e standardeve më të larta demokratike.
Osmani theksoi përkushtimin e palëkundur të Kosovës për të ecur përpara krah për krah me ShBA-të.
Ndërkohë, presidentja vuri theksin në rëndësinë e konstituimit sa më të shpejtë të institucioneve, duke ritheksuar që ky proces të zhvillohet në përputhje të plotë me kushtetutën.
“Presidentja Osmani dhe znj. Prattipati shkëmbyen gjithashtu pikëpamje për një sërë çështjesh të rëndësishme në rrafshin e bashkëpunimit bilateral. Me këtë rast, Presidentja Osmani theksoi përkushtimin e palëkundur të Kosovës për të ecur përpara krah për krah me Shtetet e Bashkuara, në frymën e besimit të ndërsjellë, vlerave të përbashkëta dhe bashkërendimit të ngushtë në proces strategjike”, thuhet në njoftimin e Presidencës.
Ndryshe, Prattipati i përcolli presidentes dhe Zotërisë së Parë urimin për Vitin e Ri nga Presidenti i SHBA-së, Donald Trump, dhe Zonja e Parë, Melania Trump./teve1.info/
