John Obi Mikel ka sugjeruar që menaxheri i Chelseat Enzo Maresca duhet të konsiderojë largimin e sulmuesit Nicolas Jackson, pas vendimit të tij të guximshëm për të dërguar në bankë portierin Robert Sanchez.
Ish-mesfushori i Chelseat ka thënë se Maresca ka qenë i guximshëm me këtë veprim, derisa tani duhet të veprojë njësoj edhe me sulmuesin Nicols Jackson.
“Maresca ka qenë mjaft i guximshëm për të hequr dorë nga Sanchez”, tha Obi Mikel.
“Mendoj se duhet ta bëjë këtë edhe me Nicolas Jackson. Lërini një pushim, nxirreni nga loja dhe vendoseni në bankë, nisni ndeshjen me Christopher Nkunku dhe shikoni se çfarë do të bëjë”, ka deklaruar Obi Mikel.
“Jackson nuk është mjaftueshëm i mirë, ky ishte një tjetër afat kalimtar ku klubi nuk ka bërë nënshkrimet që ne mendojmë se duhet të përfundojmë në top katër”, shtoi Obi Mikel.
Jackson ka shënuar 9 gola dhe 5 asistime në 24 ndeshje për Chelsean këtë sezon.
Në anën tjetër Christopher Nkunku ka luajtur në 30 ndeshje në të gjitha garat, teksa ka shënuar 13 gola dhe ka asistuar në katër të tjerë.
