Leeds United vijon të lëvizë me nxitim në merkato, për të përforcuar sa më shumë ekipin, teksa pas dy talenteve të blerë nga austriakët e Salzburg, tashmë është vetëm një hap larg zyrtarizimit të mesfushorit Marco Roca.
Spanjolli 25-vjeçar është në pronësi të Bayernit të Mynihut, ku ka luajtur vetëm 15 ndeshje në dy sezone dhe nuk bën më pjesë në planet e klubit, ndaj bavarezët kanë rënë dakord të shesin kartonin e tij për 11 milionë euro.
Sipas mediave gjermane, palët kanë arritur marrëveshjen dhe zyrtarizimi është vetëm çështje orësh, me Leeds-in që do t’i shtojë organikës një tjetër mesfushor cilësor, për të qenë edhe më konkurrues sezonin e ardhshëm.
Kujtojmë që Marc Roca është rritur te Espanyol, ku spikati në periudhën 2016-2020 dhe u transferua te Bayerni për shifrën e 16 milionë eurove, por në Bundesligë gjeti pak hapësira dhe nuk u përshtat si duhet.
Më herët Leeds United ka blerë edhe fantazistin Aaronson dhe mbrojtësin danez Kristensen nga Salzburg, duke paguar një total prej 50 milionë eurosh për të dy, teksa Roca bëhet futbollisti i tretë i afruar këtë verë.
