Deputetja e Lidhjes Demokratike të Kosovës, Hykmete Bajrami, ka akuzuar Lëvizjen Vetëvendosje (LVV) se po e çon vendin drejt përmbysjes së rendit kushtetues përmes dështimeve të vazhdueshme për konstituimin e Kuvendit dhe zgjedhjen e kryetares së tij.
Sipas Bajramit, në gjashtë seanca të mbajtura deri më tani, kandidatja e VV-së, Albulena Haxhiu, ka dështuar të sigurojë votat e nevojshme për t’u zgjedhur kryetare e Kuvendit, ndërsa kanë pasuar 34 tentativa të pasuksesshme për të formuar komisionin për votim të fshehtë.
Deputetja e LDK-së theksoi se Gjykata Kushtetuese ka bërë të qartë se deputetët janë të lirë të votojnë sipas ndërgjegjes së tyre dhe jo sipas urdhrave partiakë, duke nënkuptuar se Vetëvendosje po shkel parimet demokratike.
“Deputetët, përmes votës së tyre, kanë treguar se nuk e mbështesin krijimin e komisionit për votim të fshehtë dhe rrjedhimisht janë kundër zgjedhjes së Albulena Haxhiut në krye të Kuvendit. Këto dështime e bëjnë të qartë që nuk ka vullnet politik për këtë zgjedhje, e megjithatë, Vetëvendosje vazhdon të përsërisë të njëjtin skenar, pa asnjë rezultat,” deklaroi Bajrami.
Ajo paralajmëroi se vazhdimi i këtij qasjeje po rrezikon seriozisht stabilitetin institucional dhe kushtetues të vendit, ndërsa përgjegjësinë për situatën aktuale ia atribuon plotësisht Vetëvendosjes dhe deputetit Albin Kurti.
“Kur të përmbyset rendi kushtetues, pasojat do të jenë shumë më të rënda për të gjithë. Dhe për këtë, përgjegjësia historike do të mbetet mbi Vetëvendosjen,” përfundoi ajo.
