Lidhja Demokratike e Kosovës ka mirëpritur vendimin e PZAP-së për hedhje poshtë të ankesës së Lëvizjes Vetëvendosje, e cila ka kërkuar rivotim të procesit me postë.
Në një komunikatë për media, LDK ka theksuar se përpjekjet e Vetëvendosjes për delegjitimuar uprocesin zgjedhor ishin të pabazuara.
“Lidhja Demokratike e Kosovës mirëpret vendimin PZAP-së i cili konfirmon se përpjekjet e Lëvizjes Vetëvendosje për të manipuluar dhe delegjitimuar procesin zgjedhor ishin të pabazuara dhe shpërfaqin mosgatishmërinë e tyre për të pranuar vullnetin e mërgatës sonë. Ky akt e dëshmon qartë se pretendimet e tyre ishin thjesht një përpjekje për të mbrojtur organizimin e vetëm partiak të manipulimit të votës së mërgatës të dokumentuar me video”, thuhet në komunikatë.
LDK ka thënë se dënon ashpër fushatën e organizuar të shpifjeve dhe dezinformatave të Lëvizjes Vetëvendosje, e cila ka për qëllim të komprometojë procesin zgjedhor dhe të delegjitimojë rezultatet që nuk i përshtaten interesave të saj.
“Lidhja Demokratike e Kosovës nuk do të tolerojë që Vetëvendosje të vazhdojë të përdorë shpifjet dhe manipulimet për të përmbysur vullnetin e qytetarëve dhe për të krijuar një realitet të rremë zgjedhor. Të gjithë ata që përhapin dezinformata me qëllim të cenimit të integritetit të zgjedhjeve dhe të institucioneve të pavarura do të mbajnë përgjegjësi ligjore”, thuhet ndër të tjera./teve1.info/
PZAP-ja refuzon ankesën e VV-së për anulim të votave me postë
