Në nivelin lokal kanë fituar shtatë komuna.
Peja, Istogu, Dragashi e Juniku janë bastione të Lidhjes Demokratike të Kosovës.
Madje kjo parti e para është edhe në komunën e Prishtinës, Lipjanit e Vitisë.
Por kështu nuk ishte në nivelin qendror.
Në zgjedhjet e jashtëzakonshme parlamentare, në asnjërën prej këtyre komunave, LDK-ja nuk priu.
Më së afërmi ishte komuna e Istogut por edhe aty e para doli Lëvizja Vetëvendosje.
Dallimi ishte vetëm 253 vota në epërsi për Vetëvendosjen.
Në Junik, LDK-ja u rëndit e treta sipas votave.
Vendin e dytë ia zuri Aleanca.
E njohësi i zhvillimeve politike, Latif Mustafa thotë se ka shumë arsye pse LDK-ja nuk mund të ruaj votën lokale për nacionale.
Njërën prej tyre e sheh këtë.
“Elektorati betejën me Serbinë akoma e sheh si lider legjitim Albin Kurtin dhe jo Lumir Abdixhikun. Dmth, të njëjtit qytetar që votojnë për LDK-në në nivel lokal e shohin kredibile LDK-në për cështjen e qytetatit, por nuk e shohin kredibile për me u marrë me tema të mëdha nacionale”, ka thënë Mustafa.
Por Mustafa thotë se LDK-ja si parti edhe nuk ka mobilizim për ruajtje të votës.
“LDK-ja si parti politike nuk ka tifozëri partiake militanteske, nuk ka militant dmth kur e bëjnë mobilizimin partiak, nuk e bëjnë në saje të një demagogjie, ideologjie të caktume dhe ta nxisin atë shpirtin e militantit tek votuesit e vet, nuk e ka këtë frymë edhe pse është parti e djathtë”, ka thënë tutje Mustafa.
Megjithatë, Lidhja Demokratike e Kosovës këtë herë është rritur për 5%.
Pavarësisht kësaj, ajo vazhdon te jetë partia e tretë.
