Partitë opozitare dhe shoqëria civile po i konsiderojnë manovra politike dhe të vonshme deklaratat nga udhëheqës se Qeveria se do ta hartojë vetë një draftstatut për Asociacionin e komunave me shumicë serbe. Sipas tyre, qasja e ekzekutivit në dialog është në dëm të forcimit të subjektivitetit dhe përfundimit të procesit të dialogut.
“Këto janë taktika elektorale, fatkeqësisht janë në dëm të forcimit të subjektivitetit të Kosovës dhe përfundimit të procesit të dialogut, sidomos në obligimet e marra që janë stërzgjatur në kuptimin e implementimit të tyre dhe që kanë derivuar edhe me një marrëveshje të keqe, siç është marrëveshja e Ohrit, me dy pika që janë tepër të kontestuar dhe problematike për Kosovën. Kjo sjellje është populiste në kuptimin edhe të menaxhimit të këtij procesi, por jo pa pasoja për Kosovën dhe shtetësinë e saj”, ka theksuar Zemaj.
Në anën tjetër, drejtori ekzekutiv i Lëvizjes Çohu, Arton Demhasaj, është shprehur se tendencat se tani Qeveria do të propozojë një draft për statutin e asociacionit janë amatorizëm politik. Sipas tij, ekzekutivi ka pasur mundësi ta bëjë një gjë të tillë shumë kohë më para, mirëpo ka anashkaluar kërkesat e faktorit ndërkombëtar dhe veçmas të ShBA-së.
“Ky është amatorizëm politik që qeveria jonë po e tregon. Para se të arrihet marrëveshja bazë në Bruksel. Ne kemi pasur kërkesë eksplicite nga SHBA-ja që Kosova vetë të hartojë një draft të komunave me shumicë serbe, ndërkaq ne kemi rezistuar dhe nuk e kemi bërë këtë. Kemi pranuar marrëveshjen dhe aneksin e Ohrit dhe pavarësisht kësaj ne prapë kemi rezistuar dhe nuk kemi hartuar draft të statutit të asociacionit që e kanë kërkuar partnerët tanë ndërkombëtar, veçmas amerikanët. Kur ka ardhur një draft që është prezantuar nga BE-ja, kryeministri Kurti ka dalë dhe ka pranuar në parim atë draft, madje ka dërguar komente për të”, deklaron Demahasaj.
Kryetari i Kuvendit, Glauk Konjufca, ditë më parë ka thënë se Bashkimi Evropian nuk ka kompetencë t’i propozojë Kosovës draft-statut për themelimin e Asociacionit.
Zëvendëskryeministrja Emilija Rexhepi pati deklaruar për Zërin e Amerikës se Qeveria do ta shkruante një draftstatut pasi Gjykata Kushtetuese ta thoshte vlerësimin e saj për propozimin evropian. E, duke iu përgjigjur emisarit evropian, Miroslav Lajçak, se draftstatuti është çështje e brendshme e Kosovës, kryeministri Albin Kurti vitin e kaluar pati deklaruar se edhe “unë mund ta shkruaj një draft modern evropian”.
