Në njoftimin për media nga MSH-ja kanë bërë të ditur se gjatë prezantimit të tij Latifi elaboroi planin për transformimin e sistemit shëndetësor në Kosovë përmes inovacionit, bashkëpunimit dhe transparencës, duke prezantuar edhe Planin strategjik për këtë qëllim dhe elementet kyçe të tij.
“Ministri Latifi tha se shtatë shtyllat e programit për transformimin e shëndetësisë Kosovare kanë të bëjnë me: Digjitalizimin e shërbimeve shëndetësore, përfshirë sigurimet shëndetësore; kthimin e trurit dhe reduktimin e largimit të profesionistëve shëndetësor nga Kosova; qendrat klinike të ekselencës dhe shërbimet e avancuara klinike; kërkimet shkencore dhe krijimi i kapaciteteve hulumtuese; proceset e akreditimit ndërkombëtar-përmirësimi i cilësisë së shërbimeve; dhe decentralizimi i Shërbimit Spitalor dhe Klinik Universitar dhe riorganizimi i QKUK-së me fuqizim të sistemit shëndetësor rajonal dhe lokal”, thuhet në njoftim.
Latifi theksoi se përmes inputeve në përmirësimin e legjislacionit; mirëqenies së punonjësve shëndetësor dhe mbështetjes së tyre; akreditimit ndërkombëtar dhe përmirësimit të infrastrukturës mund të arrihen rezultatet si fuqizimi i kapaciteteve të sistemit shëndetësor dhe sigurimi i shërbimeve dhe kujdesit cilësor shëndetësor për qytetarët e vendit.
Ndërkaq, gjatë kësaj konference, Latifi bëri edhe një prezantim lidhur me transformimin e kirurgjisë në Kosovë, përkatësisht çfarë duhet bërë dhe si të arrihet kjo si, rëndësinë e lidershipit në këtë lëmi. /teve1.info/
