Ka ndërruar jetë në moshën 51 vjeçare, ish-kryeredaktori i Tëvë1, Zijadin Gashi, i cili në muajt e fundit të jetës u përball me tumorin në tru. Për vdekjen e gazetarit, kanë njoftuar familjarët, ndërsa lamtumira e fundit ju dha këtë mesditë në varrezat e kryeqytetit.
Karrierën e filloi në vitin 1997.
E shumë shpejt Zijadin Gashi u bë një ndër emrat më të njohur të gazetarisë në Kosovë.
Si gazetar që kryesisht e mbulonte politikën, Gashi u punësua në gazetën “Kosova Sot”
Terrenet e vështira në kohë luftë më të, i mban në mend ish kolegu i tij, Nazmi Elezi.
Ky kujton ditën kur bashkë me Gashin, po e përcillnin nisjen e delegacionit kosovar për në Rambuje.
“Zijadini kryesisht e ka përcjellë politikën dhe na ndalën (policia serbe në një punkt në hyrje të Sllatinës). Më bëri përshtypje ajo gjakftohtësia e tij, si një gazetar i pjekur edhe pse i ri në moshë dhe provokimeve që na i bëri polici diti t’i përballonte mjaftë mirë. I thashë Zijadin më befasove, më tha unë kështu i qetë jam edhe në jetë”, tha ish-kolegu i Zijadin Gashit, Nazmi Elezi.
E këtë vit, Zijadin Gashi njoftoi se u diagnostikua me tumor në tru.
Për këtë iu nënshtrua një ndërhyrje kirurgjike, për të cilën tha se rezultoi e suksesshme.E vetëm 4 muaj pas këtij operimi, familjarët dhanë lajmin se Zijadin Gashi, humbi betejën me këtë sëmundje në moshën 51 vjeçare.
“Edhe pse një gazetar shumë i ri, ishte një profesionist i vërtetë dhe sot konsideroj që gazetaria ka humbur një profesionist dhe gazetar të veçante dhe të rrallë. Sepse A-ja e gazetarisë së tij, ka qenë e vërteta dhe profesionalizmi”, tha Elezi.
Zijadin Gashi si gazetar, raportoi për ngjarjen më të rëndësishme të historisë së fundit të Kosovës.
Njërin nga momentet që nuk e harroi kurrë, e ndau me shikuesit në kohën sa ishte kryeredaktor i Tëvë1.
Për kontributin e jashtëzakonshëm në gazetari në rrethanat e okupimit, para dhe gjatë luftës në Kosovë, së fundmi AGK i ndau edhe një mirënjohje.
“Është një humbje për të gjithë kolegët, për të gjitha mediat ku ka punuar, duke përfshirë televizionin Tëvë1 në të cilin ka punuar së fundmi. Emri i tij është pjesë e historisë së gazetarisë në Kosovë, prandaj ka qenë një prej atyre të cilët i kemi nderuar gjatë këtij viti në rastin e 25 vjetorit të Çlirimit të Kosovës, për kontributin që e ka dhënë para luftës në Kosovë”, u shpreh kryetari i AGK-së, Xhemajl Rexha.
Zijadin Gashit, iu dha lamtumira e fundit mesditën e së martës në varrezat e kryeqytetit, na lagjen Arbëria.
Punën si gazetar për tri dekada të Gashit, të martën e nderuan figurat më të rëndësishme në vend.
