Megjithatë, autoritetet në Prishtinë dhe Beograd e kanë pranuar se ekziston një propozim i tillë për arritjen e një marrëveshje mes dy palëve.
Analisti gjerman, Bodo Weber, sheh një dinamikë të re në procesin e dialogut, por që shprehet skeptik se së shpejti do të arrihet një marrëveshje finale mes Kosovës dhe Serbisë.
Ai ende nuk e sheh Serbinë të gatshme që ta njoh pavarësinë e Kosovës.
“Çfarë përfshin konkretisht propozimi franko-gjerman mbetet e paqartë. Disa non-papers që janë publikuar, ende nuk e dimë nëse janë të sakta. Përshtypja ime është se ende jemi larg një marrëveshjeje ligjërisht të obligueshme mes palëve. Ende ka mospërputhje sa i përket marrëveshjes thelbësore që qon në njohjen formale të Kosovës nga Serbia, por janë disa hapa përpara që po bëhen për anëtarësimin e Kosovës në organizata ndërkombëtare. Është e mirëseardhur kjo dinamikë e re, por dyshoj se pa një rivendosje reale të negociatave se do të ketë marrëveshje përfundimtare e gjithëpërfshirëse”, u shpreh ai.
Weber thotë se Perëndimi është diskredituar në këtë proces për shkak se ka plasur plane për shkëmbim të territoreve mes Kosovës dhe Serbisë.
Njohësi i çështjeve politike ka folur edhe për çështjen e targave.
Sipas tij, zbatimi i këtij vendimi nga Qeveria Kurti do të ishte një lëvizje e kuptueshme.
“Lëvizjet e njëanshme të qeverisë Kurti, që synojnë forcimin e Kosovës- sovranitetin shtetëror, janë të kuptueshme, por nuk të qojnë në ndonjë progres. Pa një përparim në negociatat e dialogut dhe pa një marrëveshje përfundimtare që qon në njohjen Kosovës nga Serbia, Kosova nuk do ta përjetojë kurrë plotësisht sovranitetin dhe integritetin territorial. Por përgjegjësia për veprimet e Prishtinës qëndron në diskreditimin e dialogut nga Perëndimi, përmes negociatave të kaluara për shkëmbimin e territoreve. Megjithatë, kam frikë vendimi për targat do t’i largonte serbët e Kosovës në veri edhe më larg nga integrimi në shtetin e Kosovës”, shtoi Weber.
Procesi i dialogut mes Kosovës dhe Serbisë i nisur me synim të normalizimit të marrëdhënieve mes dy shteteve ka filluar qysh para më shumë se 10 vjetësh, dhe prej asaj kohe në opinion kanë qarkulluar një sërë idesh nga faktorë të jashtëm ndërkombëtar për zgjidhjen e problemit mes dy vendeve. Së fundmi është konfirmuar edhe zyrtarisht se një propozim tashmë është në tavolinën e kryeministrit Kurti.
Kronika e gazetarit Shpat Blakçori.
