Duke komentuar për raportin që hibrid.info e ka publikuar sot, raport ky i cili paraqet gjendjen e çrregullimit informativ në Kosovë me titull “Çrregullimi informativ në periudhën e dytë të vitit 2022”, Shahini – Hoxhaj tha se në bazë të raportimit është vërejtur që në Kosovë qëllim kryesor ka qenë ngritja e audiencës.
“Ne si departament i Gazetarisë, e konsiderojmë që është e rëndësisë së jashtëzakonshme që publiku të vetëdisohet, por njëkohësisht edhe bërësit e medieve të çfarëdo lloji qofshin ato. Ata duhet të vetëdisohen rreth asaj se çfarë po ndodhë në aspektin e komunikimit. Ka disa arsye pse ka ndodhur ky çrregullim informativ, ka qenë arsye fillimisht politike që nga fillimi i luftës në Ukrainë, do të thotë shpërfaqja e ndikimit rus është parë sidomos në përhapjen e dezinformatave dhe për përhapjen e informatave të paverifikueshme. E kjo ka bërë që ne të fokusohemi ende më shumë në aspektin e monitorimit të politikës dhe sigurisë. Natyrisht edhe në sferën sociale ka pasur ndikim. Çka vlen të theksohet këtu, është që ne në bazë të raportimit, kemi vërejtur që në Kosovë ka pasur më shumë përmbajtje të cilat kanë sjellë deri te klikueshmëria. Pra, qëllim kryesor e kanë pasur ngritjen e audiencës”, deklaroi Shahini – Hoxhaj në emisionin “Ditari”.
Sa i përket medieve serbe, Shahini – Hoxhaj theksoi se qëllimi i tyre gjatë tërë kohës ka qenë propagandues.
“Përderisa, mediet në gjuhën serbe kanë pasur qëllim propagandues, e këtu vërehen edhe infiltrimet gjeopolitike, sepse ne e dimë që sot lufta është hibride, do të thotë nuk është vetëm luftë konvencionale, ashtu siç jemi mësuar deri më tani. Tash përmes komunikimit, synohet që të ndikohen sfera të caktuara”, tha tutje Shahini – Hoxhaj në Tëvë1.
E pyetur se çfarë duhet të bëhet që qytetarët të këshillohen të mos lexojnë çdo gjë, e sidomos në zhvillime të mëdha, Shahini – Hoxhaj vlerësoi se fillimisht duhet të futet si lëndë shkollore dhe universitare, lënda e edukimit medial.
“Ne kemi arritur në përfundim të disa pikave kryesore. E para e cila është shumë e rëndësishme, është edukimi medial. Domethënë tërë publiku duhet të vetëdisohet për aspektin e përmbajtjeve të cilat ata i konsumojnë, e kjo mund të arrihet vetëm në qoftë se pjesë e kolekulës shkollore do bëhet një lëndë, e cila do jetë lëndë e edukimit medial, duke filluar nga niveli fillor e deri në nivelin universitar. Rekomandimi ynë i dytë është që mediet do duhej ta promovonin një narrativë shumë më pozitive, e që të mos fokusohemi në gjëra të cilat janë vetëm të errëta”, u shpreh ajo.
Derisa, ky raport i pari i këtij lloji në Kosovë, bazohet në trajtimin e përmbajtjeve keqinformuese për periudhën korrik-dhjetor të vitit 2022 të bëra nga stafi i hibrid.info.
Bazuar në trajtimin dhe analizën e të dhënave primare mbi të cilat u ndërtua ky raport, kuptohet se keqinformimi mbi dhe rreth ngjarjeve politike është më i larti, me 39.8%, pasuar nga temat sociale me 22.1% dhe ato që ndërlidhen me fushën e sigurisë 16.5%.
Ndërsa, metoda më e shpeshtë e keqinformimit për gjashtëmujorin e dytë të vitit të kaluar është përmes formës së dezinformimit me 28.2%, përcjellur nga clickbait me 25.4% dhe përmbajtje e pa verifikuar me 11.8%./teve1.info/.