Policia e Kosovës thotë se ka ndërmarrë të gjitha veprimet dhe masat me qëllim të ofrimit të sigurisë dhe mbarëvajtjes së procesit zgjedhor në komunat veriore të Kosovës, i cili pritet të mbahet nesër, ditë e diel.
Policia e Kosovës ka bërë të ditur se qëllimi i këtyre planifikimeve dhe koordinimeve është implementimi i planit operativ policor, raporton teve1.info.
Përmes planeve operative, Policia e Kosovës synon krijimin e një ambienti të sigurt dhe të qetë për të gjithë qytetarët e Kosovës para, gjatë dhe pas procesit të zgjedhjeve, për t’u mundësuar ushtrimin e lirë të së drejtës së votës të gjithë pjesëmarrësve.
“Njëkohësisht, institucionet relevante inkurajojnë të gjithë qytetarët që të bashkëpunojnë me Policinë e Kosovës, Prokurorinë e Shtetit, KQZ-në dhe, të raportojnë për çdo rast të kundërligjshëm që ndërlidhet me sigurinë, me procesin zgjedhor apo edhe jashtë tyre”, thuhet në njoftimin e PK-së, duke shtuar se raportimet do të trajtohen në mënyrë konfidenciale dhe të njëjtat mund të adresohen te Prokuroria e Shtetit, KQZ-ja dhe te Policia e Kosovës. /teve1.info/
