Në një lidhje direkte në Tëvë1, Vokrri tha se këtë herë nuk është problemi te keqmenaxhimi lokal apo qendror, pasi sipas tij, reshjet kanë qenë të vrullshme.
“Gjendja është shumë e rënduar. Kësaj radhe duket se nuk është problemi te një keqmenaxhim lokal apo qendror në kuptimin e organizimit të drenimit të ujërave që janë kryer më herët, veçse ka pasur reshje të mëdha atmosferike përnjëherë dhe ka qenë i pamundur të shmanget kjo situatë” ,ka thënë ai.
Vokrri thotë se përveç institucioneve shtetërore, po ka mobilizim të vullnetarëve nga qytetarët e komunave që janë përfshirë nga uji, teksa përmendi një rast të një të moshuari që u shpëtua nga qytetarët.
“Të gjithë mekanizmat qeveritar që iu përgjigjen këtyre situatave janë në gjendje mobile. Të gjithë janë në koordinim me nivelin lokal. Po e shoh që përveç institucioneve shtetërore ka edhe një mobilizim të vullnetarëve nga qytetarët e këtyre komunave dhe besoj që do jemi në gjendje ta tejkalojmë edhe këtë. Ka pasur situata ku disa qytetarë kanë qenë më të rrezikuar, por kanë ndërhyrë organet e shtetit, i kanë evakuuar ata. Pak më herët e kemi parë një situatë, ku vullnetarët e ndihmuan një të moshuar, i cili kishte mbetur në pikën më të thellë dhe rrezikohej”, deklaroi ai. /Teve1.info
