Ish-deputeti i Lidhja Demokratike e Kosovës, Adem Salihaj, ka folur për situatën politike në vend dhe procesin e zgjedhjes së presidentit, duke theksuar se mungesa e kompromisit mes partive politike po e mban të bllokuar këtë proces.
Sipas tij, do të ishte në interes të Kosovës dhe të gjitha partive politike që të arrihet një marrëveshje për tejkalimin e bllokadës, e cila tashmë ka zgjatur për më shumë se një vit.
Ai theksoi se opozita nuk po refuzon takimet, por sipas tij ende nuk ka ndonjë zgjidhje konkrete për këtë çështje, veçanërisht nëse partitë politike insistojnë që kandidati për president të vijë nga radhët e tyre.
“Shpresoj që do të ketë rezultat pozitiv, mirë është që të ketë sepse është interes i Kosovës, besoj edhe i të gjitha partive politike, sepse kemi një situatë që një vit e më tepër të bllokuar dhe nuk është mirë që të vazhdojë pa mbarim. Mendoj që partitë opozitare tashmë nuk refuzojnë takime por që në parim nuk kanë ndonjë zgjidhje konkrete për këtë çështje, nëse një parti insiston që presidenti të jetë nga ajo parti, atëherë nuk mund të gjendet asnjë zgjidhje në këtë drejtim. Nëse secila parti mendon që kandidati për president vjen nga partia e tyre atëherë ska zgjidhje, nëse s’ka gatishmëri për kompromise atëherë përsëri s’ka zgjidhje. Shpresoj që do të gjejnë zgjidhje, përndryshe nuk kanë asnjë kuptim këto takime të vazhdueshme pa asnjë ide serioze për të gjetur zgjidhje për çështjen e presidentit”, ka deklaruar ai në emisionin “Ditari” në Tëvë1.
Salihaj shtoi se duke parë zhvillimet aktuale, një nga mundësitë më reale është që vendi të shkojë në zgjedhje të reja nëse nuk arrihet marrëveshje për zgjedhjen e presidentit.
“Si mas asaj qe po shihet dhe mendoj unë të gjitha gjasat janë për të shkuar në zgjedhje, nuk shoh një zgjidhje tjetër në këtë kuptim, mund ta kem një shtyrje prej 60 ditës, të rifilloj edhe njëherë procesi i zgjedhjes së presidentit dhe të zgjasë për 60 ditë të tjera, mendoj që partitë politike ende s’kanë gatishmëri që të gjejnë zgjidhje. Ka mundësi të gjendet një emër që pajtohen së paku 80 deputetë dhe të ecë përpara vendi…. Partia Demokratike e Kosovës s’ka asnjë interes serioz për ta zgjedhur presidentin, duhet të jetë një emër që nuk iu takon partive politike”, ka deklaruar ai.
