Sipas tij, Lëvizja Vetëvendosje ka ardhur në pushtet duke fyer njerëzit si Hashim Thaçi, Kadri Veseli, Rexhep Selimi, e disa të tjerë duke u dukur si përfaqësues të ndërgjegjshëm ndaj luftës së Ushtrisë Çlirimtare të Kosovës.
Lushtaku po ashtu akuzoi ministren e Drejtësisë Albulena Haxhiu se ka shkuar në Hagë vetëm të krijojë poena politik.
“Për mendimin tim Vetëvendosja ka ardhur në pushtet duke i fyer njerëzit më të ndritshëm të luftës së Ushtrisë Çlirimtare të Kosovës, ku themelues janë po këta njerëz, Hashim Thaçi, Kadri Veseli, Jakup Krasniqi, Rexhep Selimi dhe të gjithë ata që tash po ballafaqohen me Gjykatën Speciale, dhe realisht është jo etike që në një farë forme të tregojnë një lloj “larje të hesapeve” nëse mund të them kështu, për publikun dhe qytetarët sikur janë përfaqësues të të gjithë qytetarëve dhe janë të ndërgjegjshëm ndaj vlerave të luftës së Ushtrisë Çlirimtare të Kosovës, por në anën tjetër e dimë shumë mirë që në një ceremoni festive si ka qenë 17 shkurti, nuk e bënë asnjë zë për këta burra që kanë luftuar, kanë marrë pushkën dhe kanë sakrifikuar familjet e tyre, dhe në fund të fundit edhe shtetndërtimin e kanë përsosur, dhe me pastru në një formë vetveten duke tentuar të shkojnë atje pa një kërkim të faljes, jo vetëm të saj si ministre por të gjithë Vetëvendosjes, për mendimin tim është e pasinqertë, vetëm ka dashur të krijojë poena politik”, theksoi Lushtaku.
Ai tha se Albin Kurti dhe Lëvizja Vetëvendosje ndihen inferiorë sepse nuk kanë mundur të shkruajnë historinë e Kosovës, edhe në aspektin e luftës si dhe atë të shtetndërtimit.
“Deri vonë janë munduar t’i tejkalojnë edhe sipërfaqësisht e përmendin ushtrinë, e kanë liruar nga detyra një Këshilltar të kryeministrit, Shkelzen Gashi, që ka bërë një deklaratë të famshme të tij kundër Ushtrisë Çlirimtare të Kosovës, dhe pas kësaj deklarate, pas ankesave të mëdhaja të qytetarëve, ai e ka liruar nga detyra, dhe ne e kemi parë vazhdimisht që Albin Kurti dhe Vetëvendosja njihen në një farë forme inferiorë në aspektin se nuk kanë mundur të shkruajnë historinë e Kosovës, qoftë në aspektin e luftës apo qoftë në aspektin e shtet ndërtimit. Por sidoqoftë, pavarësisht asaj, nëse ministri me të vërtetë e ka të sinqertë ndihmën ndaj Ushtrisë Çlirimtare të Kosovës, besoj që së pari të ketë mbështetje të vërtetë ndaj kësaj çështje dhe jo sipërfaqësore”, deklaroi tutje Lushtaku.
