Dreshaj tha se aktualisht në Kosovë ekzistojnë disa ligje për pensione si ai për FSK, pensionistet nga minierat, skemat kontributdhënëse dhe punëtorët e arsimit të viteve 90,andaj tha se duhet të plotësohet ligji për skemat pensionale në Kosovë.
“Jemi sot këtu për ta korrigjuar një padrejtësi, për të debatuar në lidhje për një nismë legjislative që Aleanca ka kohë që ka iniciuar. Bëhet fjalë për plotësim-ndryshimin e Ligjit për Skemat Pensionale të Financuara nga Shteti, më saktësisht, largimin e nenit diskriminues i cili parasheh që çdo pensionist të ketë përvojë pune të paktën 15 vite, në mënyrë që ta gëzojë pensionin kontributdhënës”, deklaroi Dreshaj.
Tutje, Dreshaj theksoi se me propozimin që AAK ka iniciuar, parashihet që pensionet kontributdhënëse t’i gëzojnë gjithë pensionistët, pavarësisht se sa vite kanë punuar.
“Siç e dini, kemi raste kur shumë pensionistë vetëm për një ditë nuk e arrijnë kushtin prej 15 viteve përvojë pune. Kërkesa e jonë është që të largohet ky kushtëzim jologjik, i dëmshëm dhe diskriminues për punëtorët që ishin larguar dhunshëm gjatë pushtetit të atëhershëm”, shtoi Dreshaj.
