Kryeministri Albin Kurti ka thënë se draft-statuti i Asociacionit i prezantuar nga Ekipi Menaxhues i delegacionit serb është i papranueshëm për Kosovën.
“Në këtë takim të sotëm, pas marrëveshjes për të pagjeturit ne e dëgjuam Ekipin Menaxhues që prezantoi një draft-statut me 67 nene dhe më pastaj dhamë qëndrimin tonë se një draft-statut i tillë është fundamentalisht i papajtueshëm me kushtetutshmërinë, ligjshmërinë, demokracinë, të drejtat e pakicave sipas standardeve evropiane”, tha Kurti
Sipas tij, kësisoj qartazi shihet dëshira për krijimin e një Republika Srpska në Kosovës.
Kurti ka shtuar se edhe ai e ka propozuar një ‘draft-vizion’ për të cilin thotë se beson që do të trajtohet me seriozitet nga ndërmjetësit.
“Unë propozova një draft-vizion përkitazi me nenin 7 të Marrëveshjes Bazike duke pasur në konsideratë edhe nenin 10. Në 10+1 apo 11 pika Unë kam propozuar një draft-vizion se si do të duhet të ishin vlerat dhe principet, si do të duhej të ishte korniza që rregullon të drejtat e komunitetit serb në Kosovë. Besoj që ajo do të trajtohet me seriozitet nga ndërmjetësit sepse në atë mënyrë ne do të mund të ndërtojmë diçka të mirë e të dobishme për të gjithë, jo vetëm për serbët, sepse ata duhet të jetojnë në shtetin tonë, të jenë anëtarë me të drejta dhe obligime për shoqërinë tonë“, deklaroi Kurti pas takimit.
