Prandaj sipas tij, anëtarësimi në grup i shteteve të Ballkanit Perëndimor në Bashkimin Evropian do ta stabilizonte rajonin.
“E vërteta është që Kosova dhe Ballkani Perëndimor janë në një pozitë tjetër dhe vet Kosova nuk njihet nga 5 shtete të BE-së dhe nuk do të ishte realiste të mendoje që ato shtete do ta pranonin Kosovën në BE qysh tash ose qysh dje ose nesër. Madje fatkeqësisht edhe në rast se ka një marrëveshje Kosovë-Serbi ka shtete brenda BE-së që vazhdojnë të jenë hezituese kështu që anëtarësimi si grup do të ishte ajo që do ta stabilizonte Ballkanin, ajo që do të na konvenonte neve, por nëse e shohim prej plot këndeve për momentin mbetet veç dëshirë”, tha Gashi në emisionin “Respublika” në Tëvë1.
Kurse, sa i përket nismës rajonale “Ballkani i Hapur”, Gashi tha se Kosova duhet të marrë pjesë qoftë edhe si musafir për t’i shtruar kërkesat dhe problemet e saj.
Sipas tij, zyrtarët e Qeverisë së Kosovës duhet të kursehen nga akuzat se kjo është një nismë e krijuar nga Rusia, për shkak se aty ka vende anëtare që janë në NATO si psh Shqipëria e Maqedonia Veriore.
“Tek eksponentët qeveritarë ata kanë mbajtur një qëndrim negativ mohues prej fillimit më duhet ta shtrojë faktin që nëse është një nismë rajonale ku bën pjesë Shqipëria, Maqedonia si dy shtete anëtare të NATO-së është jo shumë diplomatike të quhet si e filluar në Rusi ose Kinë. Gjë që ka ndodhur. Këto akuza janë lansuar nga zyrtarë të Qeverisë dhe është e gabuar t’i japim leksione ne shteteve anëtare të NATO-s dhe Shqipërisë dhe do duhej ta bënim dialogun ndryshe, kjo nuk nënkupton nëse kemi rezerva ndaj Ballkanit të mos i shtrojmë ato edhe në publik edhe në forume tjera”, shtoi ai./teve1.info/