Kuvendi Komunal i Mitrovicës së Veriut të premten ka vendosur për hapjen e urës mbi lumin Ibër për qarkullim të automjeteve dhe lëvizje të lirë.
Për këtë asambleistja e Vetëvendosjes në Komunën e Mitrovicës së Veriut, Aida Doli tha se kjo ka qenë kërkesë e qytetarëve dhe është votuar në kuvend komunal.
“Kjo kërkesë është e qytetareve të veriut të Mitrovicës, e kamotshme, e cila na është adresuar neve në Kuvend. Unë kam propozuar që të futet si pikë në rend të ditës, ku ka marr edhe mbështetjen e shumicës. Kjo do të jetë më e lehtë për liri të lëvizjes së qytetarëve, pasi urat bashkojnë dhe nuk ndajnë”, tha Doli.
Ajo në emisioni “Ditari” në Tëvë1 tha se për këtë vendim nuk kanë diskutuar me Qeverinë.
“Nuk kemi diskutuar për këtë vendim me nivelin qendror, pasi ka qenë kërkesë e qytetarëve. Shpresojmë që të realizohet pasi që do të lehtësojë shumë jetën e qytetarëve dhe lirinë e lëvizjes”, ka thënë Doli.
Tutje, sa i përket kërcënimeve nga Lista Serbe se do të këtë incidente pas hapjes, ajo tha se nuk beson një gjë të tillë.
Sipas saj, kjo parti nuk e ka më mbështetjen e qytetarëve të cilët e kanë votuar më herët.
“Në asnjë mënyrë nuk do ta tërheqim vendimin, pasi unë dita ditës po kuptoj se Lista Serbe vetëm interesat e qytetarëve nuk i përfaqëson. Nuk ka pasur nevojë për atë deklaratë se do të këtë incidente, pasi kjo është në të mirë të qytetarëve pa dallim etnie. Unë personalisht nuk besoj se do të këtë incidente pasi Lista Serbe nuk e ka as mbështetjen e qytetarëve të cilët e kanë votuar më herët. Po t’i dëgjosh qytetarët serbë të gjithë janë të kënaqur me këtë vendim, pasi kjo është në të mirë edhe të tyre, edhe të qytetarëve boshnjak, turk, pra pa dallim etnie. Kjo është një e drejtë na takon të gjithëve dhe po besojë dhe shpresoj që kjo të realizohet shpejtë”, shtoi asambleistja e Vetëvendosjes në Komunën e Mitrovicës së Veriut.
Kryesuesi i Kuvendit, Nedzat Ugljanin u shpreh se po kërkojnë të rikthehet diçka që ka ekzistuar 20 vjet më parë, asgjë më shumë. Por, vendimi për hapjen e urës mbi Ibër ka acaruar Listën Serbe. Këta të fundit kanë paralajmëruar se do të ketë incidente nësë një gjë e tillë ndodhë. /teve1.info/