I ashtuquajturi ekip menaxhues e ka prezantuar draftin e Statutit të Asociacionit të komunave me shumicë serbe sot në kuadër të takimit mes kryeministrit të Kosovës, Albin Kurti dhe presidentit të Serbisë, Aleksandar Vuçiq.
Kryesuesja e këtij ekipi, njëherit deputete e partisë së Vuçiqit në Parlamentin e Serbisë, Danijela Vujiçiq pasi doli nga takimi tha se e kishte të pamundur të paraqiste të gjithë draftin për 30 minuta. Madje ajo u ankua se kryeministri kosovar Albin Kurti dhe zëvendësi i tij, Besnik Bislimi e kundërshtuan gjatë gjithë kohës dhe e përqeshën atë, përcjell teve1.info.
“Pas pesë viteve, patëm rastin që të prezantojmë draft propozimin e statutit të asociacionit të komunave me shumicë serbe i cili ishte hartuar qysh në vitin 2018. Natyrisht që përveç prezantimit që i kam bërë, ishte gati e pamundur që për 30 minuta t’i paraqes të gjitha nenet dhe amendamentet. Mund të them se gjatë gjithë kohës kishte kundërshtime nga Kurti e Bislimi, dhe po të mos ishte aty Vuçiq të reagonte, nuk do të mund të prezantonim fare, sepse kishte përqeshje e sjellje jo të mirë ndaj meje. Kështu sillen çdo herë me neve. I kanë pasur pesë vjet që të konsultohen me ne dhe nuk e kanë bërë këtë. Po e them, po të mos ishte Vuçiq i cili në njëfarë formë më përplasje na mbrojti, edhe si gra, ne nuk do të mund të flisnim aty. Ajo tha se propozimi i këtij ekipi bazohet në marrëveshjen e vitit 2013 dhe atë të vitit 2015’, tha ajo. /Teve1.info/
