Inspektorati i Policisë së Kosovës ka bërë të ditur se katër zyrtarë policorë janë arrestuar lidhur me rastin e plagosjes së një pjesëtari të komunitetit serb, mbrëmë në Zveçan.
Të njëjtëve u është caktuar edhe masa e ndalimit për 48 orë.
“Pas ndërmarrjes së disa veprimeve hetimore në koordinim me prokurorinë hetuesit e IPK-së kanë arrestuar sot në orët e mbrëmjes katër zyrtarë policorë me dyshimin se kanë kryer veprën penale “mos lajmërim i veprës penale” dhe njëri nga ta është i dyshuar për veprën penale “vrasje – në tentativë” (lidhur me nenin 28 të Kodit Penal të Republikës së Kosovës)”, thuhet në njoftimin e IPK-së.
IPK po ashtu ka bërë të ditur se hetuesit e saj janë duke ndërmarrë edhe veprime tjera hetimore për të zbardhur të gjitha rrethanat e këtij rasti në koordinim të plotë me Prokurorin e Shtetit.
“Veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente”, ka njoftuar IPK.
Po ashtu gjatë ditës është bërë e ditur se të njëjtit edhe janë suspenduar nga pozitat e tyre për shkak të dyshimit të përfshirjes në këtë rast.
