Emisari i Bashkimit Evropian për dialogun Kosovë – Serbi, Miroslav Lajçak, pas takimit me kryeministrin e vendit, Albin Kurti, ka thënë se arsyeja që ka ardhur në Kosovë është për të parë se si Kosova e sheh planin e zbatimit të propozimit evropian.
Lajçak para medieve për takimin e fundit mes Kurtit dhe presidentit serb në Bruksel, ka thënë se ishte i suksesshëm, si dhe që të dyja palët janë pajtuar që nuk ka më nevojë për diskutim të përmbajtjes, raporton teve1.info.
“Takimi jonë i fundit në Bruksel ishte i suksesshëm. Kryeministri Kurti dhe presidenti Vuçiq u pajtuan se s’ka nevojë të diskutohet më për përmbajtjen. Teksti tashmë është publik dhe të gjithë e dinë se çka përmban. Por që të bëhet dokument ligjërisht i obligueshëm duhet të pajtohemi se si të implementohet. Duhet të dimë cilat janë hapat, sekuencat e tij dhe afatet kohore. Përndryshe do të jetë vetëm marrëveshje politike dhe jo formale”, tha Lajçak.
Për takimin e sotëm me kryeministrin Kurti, ai tha se ishte diskutim konstruktiv, i rëndësishëm dhe shumë i dobishëm.
“Qëllimi kryesor i vizitës në Prishtinë është të diskutoj implementimin e dokumentit me kryeministrin Kurti. Mund ta them se patëm diskutim konstruktiv, të rëndësishëm dhe shumë të dobishëm”, tha ai.
Lajçak mes tjerash tha se ky takim i ka përmbushur pritjet e tij.
“Qëllimi kryesor i vizitës është të shoh se si Kosova e sheh implementimin. Dhe ky takim ka përmbushur pritjet e mia në këtë kontekst”, u shpreh ai.
Më 27 shkurt, në Bruksel, krerët e Kosovës dhe Serbisë e kanë pranuar planin evropian, por nuk është nënshkruar pasi që presidenti serb, Vuçiq, nuk ka qenë i gatshëm.
