Kuvendi i Kosovës nuk ka mbajtur seancë lidhur me sulmin terrorist në kanalin e Ibër-Lepencit më 29 nëntor në Varagë të Zubin-Potokut.
E për këtë deputetët janë kritikuar nga juristi Azem Vllasi e njohësi i çështjeve të sigurisë, Nuredin Ibishi në emisionin “InfoNata” në Tëvë1.
Sipas tyre kjo tregon joseriozitet, kur për një gjë të tillë është diskutuar edhe në Parlamentin Evropian.
Juristi Azem Vllasi, ka thënë se seanca e së hënës për punën e Qeverisë Kurti ka mundur të shtyhet dhe të thirret një e jashtëzakonshme për sulmin e 29 nëntorit
“Për këtë çështje mendoj që është dashtë një mbledhje e posaçme e Kuvendit dhe duhet. Të gjithë mekanizmat e Kosovës po luftojnë me sanu dëmin mos me pas dëme të mëdha, a nuk u bë me lanë një ditë tjetër seanca me kritiku Kurtin. Në Parlamentin Evropian mu diskut për aktin terrorist e parlamenti jonë jo”, ka thënë Vllasi.
Edhe Nuredin Ibishi njohës i sigurisë ka kritikuar deputetët që nuk kanë mbajtur seancë lidhur me këtë sulm.
Ai ka thënë se kjo tregon qasje joserioze dhe injorancë
“E pamë parlamentin e lodhët me aq patetikë e jo, kjo tregon që ne nuk jemi serioz, tregon injorancë totale. Për një akt të tillë po mblidhet Këshilli i Ministrave të Parlamentit Evropian po debaton, ndërsa ne përplasemi me vete”, ka thënë Ibishi në “InfoNata”.
Kuvendi i Kosovës të hënën ka mbajtur seancë lidhur me punën 4 vjeçare të Qeverisë Kurti e thirrur nga Aleanca për Ardhmërinë e Kosovës.
