Shkruan:Flamur Kaçiu
Kërkesa e Albin Kurtit dhe LVV-së që të zgjidhet kryetari i Kuvendit, pozita e tretë më e rëndësishme politike dhe shtetërore, pa asnjë kompromis politik me partitë e tjera, kur nuk i kanë numrat, është planifikim i dështimit.
Llogaritjet që i kanë bërë, se partitë e tjera apo ndonjë deputet mund të veprojë ndryshe, deri më tani nuk kanë dhënë rezultat. Partitë nuk po shohin ndonjë dobi strategjike që të votojnë pro pa përfitime politike.
Partia e parë ka të drejtë të propozojë kandidatin, dhe secili deputet duhet të marrë pjesë në votim, por në asnjë mënyrë kjo nuk e obligon ndonjë deputet të votojë për kandidaten e propozuar. Ky është themeli i sistemit të republikës parlamentare demokratike. Në disa vende të botës, deputetëve mund t’u kërkohet të votojnë bllok sipas vendimit të partisë, por as aty nuk janë të detyruar.
Çka mund të bëjnë partitë në raste të tilla është përjashtimi nga grupi parlamentar, por jo imponimi i votës. Pas dështimeve fillestare, për të ruajtur Albulena Haxhiun, LVV-ja, duke e përdoruar kryesuesin, kanë kaluar në kërkesën për votim të fshehtë. Madje u deklaruan se, nëse nuk marrin votat e mjaftueshme në këtë mënyrë, ajo do të tërhiqet. Kjo është thjesht një lojë politike, njësoj sikurse AAK që thotë se do t’i votojë dy deputete të caktuara nëse propozohen, apo si LDK që bën thirrje për qeveri teknike.
LVV-ja arsyetohet se partitë e tjera duhet ta votojnë kandidaten e tyre sepse ajo është pjesë e Kryesisë së Kuvendit, dhe se kjo duhet të trajtohet njësoj si votimi i nënkryetarëve, që si praktik bëhet në grup. Pozita e kryetarit të Kuvendit, e cila e zëvendëson edhe presidentin, nuk mund të krahasohet me atë të nënkryetarëve.
Nënkryetarët votohen në grup, siç është praktika, dhe në këtë grup do të jetë edhe një nënkryetar nga LVV-ja, njësoj si në përbërjen e kaluar. Për të dalë nga kriza, Albin Kurti duhet të bëjë përpjekje më të mëdha për të arritur marrëveshje me LDK-në, duke e përfshirë në diskutim edhe pozitën e presidentit, meqenëse LDK-ja ka më shumë interes për pozita me prestigj sesa me përgjegjësi reale.
Pasi LDK-ja thotë se nuk e dëshiron një koalicion, ndërsa LVV-ja nuk dëshiron bashkëpunim me PDK-në, një mundësi tjetër është që Albulena Haxhiu të tërhiqet vullnetarisht nga kandidatura si hap i kompromisit personale për t’i hapur rrugë zgjidhjes së krizës.
Si pozita e kryetarit të Kuvendit, ashtu edhe ajo e presidentit, duhet të jenë pjesë e një kompromisi politik për dalje nga ngërçi. Do të ishte e turpshme që zgjidhja të vijë vetëm pas ndërhyrjes së ambasadave.
Opinioni përmban pikëpamjet e autorit dhe nuk prezanton qëndrimet editoriale të teve1.info
