Në këtë gjendje erdhi kjo veturë e Policisë së Kosovës, të hënën.
Kjo pas një aksidenti në kryeqytet, ku katër persona morën trajtim mjekësor.
Ngjashëm si ky rast, pati edhe të tjera, ku në aksidente u përfshinë veturat zyrtare të këtij institucioni.
Riparimi i tyre bëhet kryesisht nga vetë organizata e sigurisë.
Por, kur janë të obliguar edhe zyrtarët policorë të paguajnë në rast se dalin fajtor?
“Ata nuk duhet të ngarkohen me riparimin e veturës dhe t’a blejnë një veturë të ngjashme nëse është bërë, shkaktuar dëmi, ajo i mbetet organizatës sepse ata kanë qenë në krye të detyrës dhe për atë arsye ka ndodhë edhe ajo fatkeqësi, mirëpo fajësinë e tyre askush nuk e merr dhe nëse shpallen fajtor për një vepër të atillë duhet t’i paguajnë shpenzimet e gjyqit dhe kundërvajtjet ashtu siç e parasheh ligji”, deklaroi ish-drejtori i Policisë së Kosovës, Reshat Maliqi.
Ish-drejtori i Policisë thotë se momentin kur policët janë në intervenim, bie poshtë respektimi i shenjave të komunikacionit.
“Vetura e Policisë përderisa është në përdorim të alarmit në të gjitha udhëkryqet, ku rregullohet komunikacioni me shenja të ndriçimit, me semaforë, përparësi kanë veturat qoftë ajo të jetë e Ambulancës, Emergjenca, qoftë e zjarrfikësve, e FSK-së apo e Policisë, ato vetura janë me prioritet dhe të gjithë pjesëmarrësit tjerë duhet me kujdes të skajohen rrugëve dhe t’i japin përparësi atyre dhe jo të ndodhin kjo që ndodhi”, thotë ai.
Edhe nënkoloneli në pension tregon se punonjësit e Policisë janë të liruar nga ndonjë pagesë, në këso raste.
“Nëse zyrtari policor gjatë kryerjes së detyrës zyrtare kryen aksidente dhe ndërkohë është fajtor ai por dëmet materiale nuk janë aq të mëdha atëherë mund t’i mbulojë Policia, kurse ndaj personit zyrtar, policit mund të ndërmerren masa administrative ndaj tij. Gjithashtu edhe rasti tjetër kur kemi të bëjmë me kundërvajtje ose vepër penale, kur zyrtari policor është fajtor ose ka vozitë me automjet tejmase ose jashtë detyrës zyrtare atëherë zyrtari policor është fajtor, përgjigjet për kundërvajtje respektivisht për vepër penale dhe shpenzimet i bart të gjitha ai”, deklaroi nënkoloneli Refki Morina.
Tëvë1 ka dërguar pyetje për këtë çështje edhe në Policinë e Kosovës, por që deri në publikim të kronikës nuk ka pasur përgjigje.
