Ky është ekipi mbrojtës.
Tre avokatë e përfaqësuan Sërgjan Lazoviqin në betejën e tij kundër akuzave për krime lufte.
Por as këta të tre, nuk e ndihmuan ish pjesëtari i xhandarmërisë serbe që t’i shpëtonte dënimit me burgim.
“Të akuzuarin e gjykon me dënim burgu në kohëzgjatje prej 12 vite e gjashtë muaj.”, ka thënë Ismaili.
Lazoviq u shpall fajtor për krime lufte të kryera gjatë viteve 1998-99, kryesisht në fshtarat e komunës së Malishevës.
“Është vërtetuar se i akuzuari Sërgjan Lazoviq, ka qenë pjesëmarrës me forcat policore ushtarake serbe që kanë kryer arrestime, keqtrajtime, shkatërrime dhe plaçkitje të popullatës civile në fshatin Panorc, komuna e Malishevës.”, u shpreh tutje Ismaili.
Me armë në dorë e i uniformuar, Lazoviq, bashkë me persona të tjerë të paidentifikuar, kryen arrestime të kundërligjshme.
Në duart e tyre sipas aktakuzës, ranë të paktën 500 civilë shqiptarë, të cilët më pas edhe u keqtrajtuan fizikisht e psiqikisht.
“Të cilët i torturojnë fizikisht me armë, mjete të forta, si shkopinjë prej druri, mjete të punës dhe kabllo, duke iu shkaktuar dhimbje të mëdha fizike dhe psikike. Me ç’rast, trembëdhjetë prej tyre i arrestojnë dhe i dërgojnë në burgun e Dubravës, kurse të tjerët i lirojnë.”, ka thënë Ismaili.
Përpos kësaj, Lazoviq u gjetë fajtor edhe për dëbimin e shqiptarëve.
“Fillimisht e rrethuan fshatin Panorc dhe fshatrat përreth, dhe pastaj i bombarduan me makineri të rënda, kurse në fund hyjnë me këmbësori duke shkuar shtëpi për shtëpi, dhe nën kërcënimin e armëve i detyrojnë banorët që të largohen nga shtëpitë e tyre.”, theksoj Ismaili
Të dëmtuarve në këtë rast, në mënyrë që t’u kompensohet dëmi u udhëzuan për kontest juridiko – civil.
