Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka vizituar kompaninë Electro Plus në Zubin Potok, ku është takuar me pronaren e kompanisë, Ferdane Shkreli Terllabuqi, dhe drejtorin Hetem Terllabuqi.
Sipas ministres, Electro Plus është kompania e parë dhe e vetme shqiptare në komunën e Zubin Potokut që merret me prodhimin e transformatorëve elektrikë, si dhe me testimin dhe certifikimin e tyre përmes teknologjisë së avancuar.
Gjatë vizitës u bë e ditur se kompania aktualisht ka 15 punëtorë aktivë, ndërsa pritjet janë që numri i të punësuarve të arrijë në 50 gjatë këtij viti, me zgjerimin e kapaciteteve të prodhimit.
Kusari-Lila ka theksuar se fuqia punëtore e kompanisë përbëhet kryesisht nga banorë të zonës së Zubin Potokut, duke ndikuar drejtpërdrejt në krijimin e vendeve të reja të punës dhe uljen e papunësisë në këtë komunë.
Sipas saj, interesim për punësim në kompani ka edhe nga komuniteti serb.
Ajo ka përgëzuar drejtuesit e kompanisë për angazhimin në zhvillimin ekonomik lokal dhe krijimin e vendeve të reja të punës për të rinjtë, duke inkurajuar që iniciativa të ngjashme të zhvillohen edhe më tej në komunat veriore të Kosovës.
