Kryeministri i Kosovës, Albin Kurti ka pritur në takim të dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach.
Sipas komunikatës së Zyrës Kryeministrit në këtë takim u diskutuan marrëdhëniet dy paleshe, dialogu me Serbinë e situata e sigurisë në vend.
Kurti tha se zbarkimi i 200 trupave britanike në kuadër të KFOR-it, pas sulmit të 24 shtatorit po i kontribuon sigurisë.
“Kryeministri Kurti falënderoi Lord Stuart Peach për bashkëpunimin me Mbretërinë e Bashkuar në fushën mbrojtjes dhe rolin aktiv të saj në fushën e sigurisë, veçanërisht përmes misionit të KFOR-it. Theksoi se zbarkimi i një kontingjenti prej 200 ushtarëve britanikë në Kosovë, si kundërpërgjigje ndaj sulmit terrorist të 24 shtatorit, po i kontribuon situatës së sigurisë”, thuhet në komunikatën e Qeverisë.
Peach, sipas njoftimit të ambasadës së Britanisë së Madhe ka zhvilluar takim edhe me presidenten e Kosovës, Vjosa Osmani.
