Kryeministri i Kosovës, Albin Kurti, e ka vizituar Inspektoratin e Policisë së Kosovës, ku është pritur nga kryeshefi Ekzekutiv i këtij institucioni, Kushtrim Hodaj, raporton teve1.info
Sipas një njoftimi të IPK-së, gjatë këtij takimi ku i pranishëm ishte edhe ministri i Punëve të Brendshme, Xhelal Sveçla, Hodaj e informoi Kryeministrin Kurti për punën dhe të arriturat e Inspektoratit Policor të Kosovës.
“Temë e diskutimit ishin edhe trajtimi i ankesave të qytetarëve, inspektimet si dhe angazhimet tjera të IPK-së drejt fuqizimit të integritetit policor. Në fund të takimit Kryeshefi Hodaj e falënderoi Kryeministrin Kurti për vizitën dhe përkrahjen e vazhdueshme që Qeveria ka dhënë në zbatimin e mandateve ligjore të IPK-së si një mekanizëm i rëndësishëm i sundimit të ligjit në Republikën e Kosovës”, thuhet në njoftimin e Inspektoratit.
Sipas IPK-së, kjo ishte vizita e parë e Kryeministrit Kurti në IPK i cili falënderoi zyrtarët për pritjen duke shprehur mbështetjen e Qeverisë për fuqizimin e rolit të Inspektoratit Policor si mekanizëm i kontrollit dhe mbikëqyrjes së policisë.
