Kryeministri Albin Kurti e ka cilësuar Universitetin e Prishtinës si institucionin shkollor më të rëndësishëm të historisë moderne të Kosovës.
Në 54-vjetorin e themelimit të UP-së, Kurti ka thënë se në këtë institucion janë shkolluar dhe formuar elitat intelektuale, kulturore dhe politike të shoqërisë, të cilët u kanë prirë proceseve për progres shoqëror, rezistencë, çlirim e për shtetndërtim të Kosovës.
“I themeluar fillimisht mbi tre fakultete, ndër vite Universiteti i Prishtinës shkoi duke u rritur dhe zgjeruar derisa tani ka 14 fakultete, me dhjetëra departamente dhe dhjetëra programe bachelor, master dhe të studimeve doktorale. Mijëra studentë kanë studiuar dhe janë diplomuar në Universitetin e Prishtinës, teksa i kanë iniciuar dhe prirë shumë proceseve shoqërore dhe politike. Studentët e UP-së ishin zgjues të vetëdijes politike në protestat e vitit 1981, sikur edhe në protestat e viteve 1989 e 1990 dhe në lëvizjen studentore të viteve 1997 dhe 1998; studentët e UP-së ishin ideatorët e lëvizjes për pajtimin e gjaqeve në vitet 1990-’91; studentë të UP-së u bënë luftëtarë të Ushtrisë Çlirimtare të Kosovës; studentë të UP-së ishin firmëtarë të Deklaratës së Pavarësisë së Kosovës më 2008; studentë të UP-së kanë shtruar dhe ndjekur rrugë akademike dhe shkencore të suksesshme në fusha të ndryshme në Kosovë dhe nëpër botë”, ka shkruar ai.
Ai më tej ka uruar që në dekadën e gjashtë, Universiteti i Prishtinës të vazhdojë me ligjërata dhe provime, “me hulumtime dhe botime; për shkencë dhe dije; për art dhe kulturë; për edukim dhe arsim; për universalen dhe publiken; për shoqërinë dhe shtetin; për progresin dhe mirëqenien; për historinë dhe të ardhmen”.
