Kryeministri i Kosovës, Albin Kurt, i shoqëruar nga kryetarja e Komisionit Parlamentar për Mjedis, Ushqim, Bujqësi, Planifikim dhe Zhvillim, Fitore Pacolli Dalipi, sot në mëngjes takoi raportuesen për Kosovën në Parlamentin Evropian, Viola von Cramon, e shoqëruar nga shefi i Zyrës së Bashkimit Evropian në Kosovë, Tomas Szunyog, dhe bashkëpunëtorë të tjerë.
Në këtë takim është diskutuar për zhvillimet në vend, për procesin e dialogut në Bruksel dhe marrëdhënieve mes Kosovës dhe Serbisë.
Në njoftim për media është bërë e ditur se është diskutuar edhe për procesin pas-zgjedhor në katër komunat në veri të vendit.
“Kryeministri rikujtoi se zgjedhjet në katër komunat në veri të vendit ishin shtyer një herë në dhjetor, dhe se tani pas mbajtjes së tyre me 23 prill, është e rëndësishme që të fillojmë sa më parë me ofrimin e shërbimeve bazike për qytetarët, të cilat kanë munguar që nga fillimi i muajit nëntor të vitit të kaluar pas dorëheqjes së kryetarëve pararendës”, thuhet në njoftim.
Ndërsa, për sa i përket dialogut të ndërmjetësuar nga Bashkimi Evropian dhe Marrëveshjes Bazike dhe Aneksit të Zbatimit të saj, në njoftim thuhet se Kurti përsëriti që duhet zbatim i shpejtë, i plotë dhe i pakushtëzuar.
“Kryeministri shtoi që është kënaqësi të pres znj. Cramon në takim në këto kohë të rëndësishme dhe e falënderoi atë për përkrahjen për anëtarësim në Këshillin e Evropës dhe Bashkimin Evropian”. /teve1.info/
