Kryeministri i Kosovës, Albin Kurti, është takuar me përfaqësuesit e dy kompanive franceze të fushës së energjisë së ripërtritshme “Voltalia” dhe “TotalEnergies”.
Nga këto takime, Kurti ka shprehur interesimin e Kosovës për të mirëpritur investitorët e huaj dhe dedikimin e Qeverisë për krijimin e një mjedisi të favorshëm për ta.
“Ai i njoftoi përfaqësuesit e “Voltalia” dhe “TotalEnergies” me detajet e Strategjisë së Energjisë 2022-2031, me të cilën synohet që të shtohen 1,200 MW nga burimet e ripërtëritshme. Veçoi projektet ekzistuese dhe të ardhshme për ndërtimin e kapaciteteve të reja gjeneruese nga energjia solare dhe e erës, me theks te mundësitë që ofron ankandi aktual për ndërtimin e 100 MW nga energjia solare të shpallur nga Ministria e Ekonomisë, dhe ankandi i ardhshëm i erës me kapacitet deri në 150 MW i cili pritet të shpallet gjatë vitit të ardhshëm, si dhe foli për investimet e planifikuara të Qeverisë në këtë sektor për tri vitet e ardhshme”, thuhet në komunikatë për media.
Tutje, sipas komunikatës, Kurti ka veçuar sukseset në luftimin e krimit dhe korrupsionit, sundimin e ligjit, progresin demokratik, stabilitetin institucional dhe funksionalizimin e Gjykatës Komerciale, etj.
“Kryeministri vuri në dukje se Kosova në vitet e fundit ka shënuar rritje të theksuar të BVP-së, e cila vitin e ardhshëm do të jetë për 50% më e lartë sesa që ishte në vitin 2020”, thuhet në komunikatë.
Përfund është bërë e ditur, që përfaqësuesit e të dy kompanive shprehën mirënjohje për përparimin e Kosovës.
“Përshëndetën edhe mundësitë aktuale dhe të ardhshme të ofruara për investime në sektorin e energjisë së ripërtëritshme dhe procesin profesional dhe transparent. Gjithashtu shprehën gatishmërinë për të vazhduar angazhimin për pjesëmarrje në këto mundësi që ofron Kosova”./teve1.info/
