Kryeministri i Kosovës, Albin Kurti, priti në takim Ambasadorin jorezident të Shtetit të Katarit në Kosovë, Jabor Ali Hussein Al Hawashela Al Dosari, raporton teve1.info
Sipas komunikatës për medie të Qeverisë, në këtë takim u diskutua për marrëdhëniet bilaterale dhe mundësitë për t’i thelluar ato.
“Ambasadori Al Dosari theksoi gatishmërinë dhe vullnetin e tij dhe të Shtetit të Katarit për të thelluar bashkëpunimin me Republikën e Kosovës, veçanërisht në fushën ekonomike. Ai shprehu interesim në lidhje me ankandet e energjisë së ripërtërishme që kanë filluar të zhvillohen në Kosovë. Ambasadori vlerësoi se këto ankande janë një mundësi e mirë konkurruese për bizneset e Katarit. Temë tjetër e diskutimit ishte edhe Fondi Sovran, duke qenë se Katari ka vetë një fond sovran. Kryeministri informoi Ambasadorin për ligjin e miratuar në Kuvend për themelimin e Fondit Sovran në Kosovë, që përbën hapin e parë drejt ndërtimit të strukturës organizative të Fondit”, thuhet në komunikatë.
Sipas njoftimit, në bisedë u theksua dëshira për bashkëpunim në fushën e kulturës dhe turizmit.
“Në këtë drejtim, kryeministri shprehu interesimin e Kosovës për të krijuar një partneritet në këto fusha, në të mirën e dy shteteve. Ambasadori Al Dosari theksoi se Katari e sheh Kosovën si një vend premtues për investime dhe bashkëpunim të pasur në interes të të dyja palëve dhe bizneseve të tyre”, thuhet në komunikatë.
