Kryeministri i Kosovës, Albin Kurti i cili po qëndron në Shtetet e Bashkuara të Amerikës ka takuar kryeministrin e Islandës, Bjarni Benediktsson.
Sipas komunikatës së Qeverisë, palët kanë diskutuar mbi rëndësinë e zhvillimit të marrëdhënieve bilaterale përmes rritjes së bashkëpunimit ekonomik dhe shkëmbimit tregtar, në kuadër edhe të EFTA-s, si një platformë e mirë për bashkëpunim konkret ekonomik.
“Kurti e falënderoi shtetin e Islandës për mbështetjen e vazhdueshme dhe të palëkundur ndaj Kosovës në etapat shtetndërtuese. Gjithashtu shprehu mirënjohjen për përkrahjen mbi liberalizimin e vizave me vendet e zonës Shengen dhe për anëtarësimin e Kosovës në organizatat ndërkombëtare, veçanërisht në Këshillin e Evropës”, thuhet në komunikatë.
Derisa, i pari i Qeverisë kërkoi mbështetjen e Islandës për aderimin në këtë organizatë.
“Duke shprehur orientimin pro perëndimor të Republikës së Kosovës dhe qëllimin kyç të vendit për anëtarësim në NATO, ku Islanda është edhe një nga anëtaret themeluese, Kryeministri Kurti kërkoi mbështetjen e Islandës për aderimin në këtë organizatë”, thuhet ndër të tjera.
Tutje, kryeministri i kërkoi përkrahjen e Islandës për anëtarësimin e Kosovës në Organizata si ICAO, EASA dhe Eurocontrol.
“Përgjatë takimit u bisedua dhe për mbështetjen në rihapjen e hapësirës së ulët ajrore, e ku kryeministri kërkoi po ashtu edhe përkrahjen e Islandës për anëtarësimin tonë në organizata si ICAO, EASA dhe Eurocontrol”, thuhet në komunikatë./teve1.info/
