Kryeministri i Kosovës, Albin Kurti, ka mirëpritur në ndërtesën e Qeverisë rektorin e Fachhochschule Flensburg dhe deputetin e Parlamentit të Hamburgut, Dr. Sven Tode.
Sipas Zyrës së Qeverisë, Kurti ka njoftuar deputetin Tode mbi arritjet e Qeverisë në fushën e arsimit.
Derisa, thuhet se gjatë bashkëbisedimit është diskutuar për mundësitë dhe potencialin që paraqet mërgata në Gjermani.
“Gjatë bashkëbisedimit u diskutua edhe rreth marrëdhënieve bilaterale në këtë drejtim, bashkëpunimit akademik dhe për mundësitë dhe potencialin që paraqet mërgata jonë në Gjermani për fuqizimin edhe më tej të marrëdhënieve tona”, thuhet në komunikatë.
Më tej, Kurti ka treguar se buxheti për sektorin e arsimit është rritur me 26%.
“Kryeministri Kurti theksoi se buxheti për sektorin e arsimit është rritur me 26%, kurse studimet universitare janë pa pagesë për studentët. Dr. Sven Tode shprehu mirënjohjen e tij për mikpritjen dhe përgëzoi qeverinë e Kosovës për përparimet e bëra në fushën e arsimit”, thuhet në komunikatë.
Në komunikatë bëhet e ditur se gjatë qëndrimit të deputetit Tode në Kosovë, ai do të vizitojë dhe disa universitete për të parë nga afër zhvillimet dhe mundësitë për bashkëpunim.
“Gjatë qëndrimit të tij në Kosovë, z. Tode do të vizitojë disa universitete dhe shkolla për të parë nga afër zhvillimet dhe mundësitë për bashkëpunim të mëtejshëm. Në Hamburg, ai është në kontakt të vazhdueshëm me studentët shqiptarë dhe synon të forcojë lidhjet akademike dhe kulturore ndërmjet dy vendeve”, thuhet në komunikatë./teve1.info/
