Kryeministri Albin Kurti ka thënë se është shumë optimist që marrëveshja që çon në normalizimin e plotë të marrëdhënieve me Serbinë, mund të ndodhë këtë vit.
“Mendoj se takimi i ardhshëm do të tregojë se sa shpresëdhënës mund të jemi për këtë vit. Unë jam optimist. Jam shumë optimist se mund të ketë një marrëveshje këtë vit… Ne kemi nevojë për një përfshirje të madhe të bashkësisë ndërkombëtare, por në të njëjtën kohë, ne kemi nevojë që Beogradi zyrtar, që të fillojë dhe të distancohet si nga e kaluara, përkatësisht nga Millosheviqi, ashtu edhe nga e tashmja, domethënë nga presidenti despotik Putin”, ka thënë ai.
Kurti këto komente i bëri në vigjilie të takimit në Bruksel me presidentin serb Vuçiq, më 27 shkurt.
Ai shprehu keqardhjen që marrëdhëniet ndërmjet Kosovës dhe Serbisë nuk janë normale teksa pretendon se Beogradi është izoluar duke mos u shkëputur nga Kremlini.
Teksa, lideri i ekzekutivit shtoi se kishte frikë se kishte mundësi që mercenarët e Grupit Wagner ta sulmonin Kosovën.
Kurti deklaroi për France24 se lideri serb Vuçiq “ndonjëherë bën një gjest që tregon se ndoshta ai nuk është plotësisht në linjë me Putinin sepse dëshiron të marrë fondet e BE-së dhe tolerancën e SHBA”.
