Kryeministri në detyrë dhe kryetari i Lëvizjes Vetëvendosje, Albin Kurti, ka njoftuar se Elvira Ibrahimi-Hoti i është bashkuar subjektit të tij dhe do të jetë pjesë e listës së kandidatëve për deputetë në zgjedhjet e ardhshme.
Në një postim në Facebook, Kurti ka vlerësuar profilin profesional të Ibrahimi-Hotit, duke theksuar përvojën e saj në fushën e ekonomisë, auditimit dhe ndërmarrësisë.
“Me 18 vjet përvojë si kontabiliste dhe auditore e certifikuar, me gradën akademike master në ekonomi dhe ndërmarrëse për më se një dekadë, Elvira është vlerë e shtuar në Lëvizjen tonë. Ajo njeh mirë terrenin dhe e di saktësisht e në hollësi se si duket ekonomia nga lart poshtë, i kupton dhe di t’i adresojë hallet e bizneseve të vogla dhe të mesme, si dhe të ndërmarrësve të rinj”, ka shkruar ai.
Kurti ka theksuar gjithashtu angazhimin e saj në edukimin financiar dhe digjital, duke e cilësuar si edukatoren e parë digjitale për tatime dhe financa në Kosovë.
“Si edukatorja e parë digjitale për tatime dhe financa në Republikën e Kosovës, Elvira i qëndron prapa bindjes se: njerëzit duhet të edukohen para se sistemi të mund t’i ndëshkojë. Ajo ka shërbyer në pozita drejtuese e menaxhuese, po ashtu si asistente në Fakultetin e Ekonomisë dhe ka trajnuar qindra gra e të rinj.
Elvira është e martuar dhe nënë e përkushtuar e dy fëmijëve. Ajo i do malet dhe ecjen, andaj jam i lumtur që do të lëvizim së bashku në VETËVENDOSJE! dhe garojmë në listën fituese për legjislaturën e njëmbëdhjetë të Kuvendit të Republikës së Kosovës”, ka përfunduar Kurti./teve1.info/
