Kryeministri i Kosovës, Albin Kurti ka reaguar pas shpërthimit të një granate dore në Liqenin e Ujmanit të dielën që u hodh nga disa persona.
Kurti është shprehur se ky rast vije pasi Serbisë nuk po i pëlqen normaliteti që është krijuar në këtë pjesë dhe humbjes së ndikimit të saj bashkë me qarqe mike të Serbisë.
Në një reagim në Facebook, kryeministri është shprehur se “duke e humbur ndikimin në këtë zonë, nervozë u bëhet agresivitet”.
“Serbisë dhe qarqeve të caktuara mike me të, nuk iu leverdis normaliteti i krijuar në atë pjesë të vendit tonë. Duke e humbur ndikimin në këtë zonë, nervoza u bëhet agresivitet. Edhe grupe të ndryshme kriminale, pak a shumë të lidhur me të, kanë humbur mundësinë për përfitime enorme çfarë i patën për më shumë se dy dekada që nga çlirimi i Kosovës. Kjo është e dhimbshme për ta dhe vështirë e pranueshme”, ka shkruar Kurti.
Ai ka thënë se sundimi i ligjit, rendi publik janë vlera themeltare dhe interes i përbashkët, duke theksuar se Policia e Kosovës do të zbulojë kryesit e veprës.
”Por, rrugë tjetër nuk ka. Sundimi i ligjit dhe rendi publik, siguria dhe paqja, janë vlera themeltare dhe interes i përbashkët i shoqërisë dhe qytetarëve bashkë me shtetin e Kosovës. Patjetër që institucionet e sigurisë, marrë për bazë profesionalizmin bashkëkohor dhe vullnetin e palëkundur, do të zbulojnë aktorin apo aktorët e këtij sulmi kriminal dhe do t’i sjellin para drejtësisë. Kjo pjesë, ashtu si të gjitha tjerat të vendit tonë, me potencialin dhe bukuritë e saj do të përdoret nga të gjithë qytetarët pa dallim”, ka shkruar Kurti.
