Kryeministri i Kosovës, Albin Kurti, ka deklaruar se partia e tij e kishte të qartë paraprakisht se as presidentja aktuale, Vjosa Osmani, e as ndonjë kandidat tjetër për president potencial nuk do ta garantonin kuorumin e nevojshëm në Kuvend.
Në një konferencë për media, Kurti tha se kjo ishte arsyeja kryesore pse u ndërmorën veprime dhe bashkëpunime me partitë tjera politike.
“Ne e kemi ditur paraprakisht që as presidentja aktuale as presidenti potencial nuk na e garantojnë kuorumin, e kemi ditur. Kjo u pa mbrëmë me ata 66 deputetë. Në këtë situatë ne kemi bashkëpunuar me partitë tjera dhe kjo është arsyeja kryesore pse ne kemi vepruar ashtu siç kemi vepruar dhe në fund erdhëm në situatën ku nuk ishte kandidate edhe presidentja aktuale”, deklaroi Kurti.
Ai theksoi se zhvillimet e fundit në Kuvend treguan qartë vështirësitë për sigurimin e kuorumit të nevojshëm për procesin e zgjedhjes së presidentit. /teve1.info/
