Kryeministri i Kosovës, Albin Kurti, i shoqëruar nga ministrja e Arsimit Shkencës, Teknologjisë dhe Inovacionit, Arbërie Nagavci dhe zëvendësministri i Punëve të Brendshëm, Bardhyl Dobra, kanë vizituar Institutin Francez në Prishtinë, ku janë pritur nga ambasadori francez në Kosovë, Olivier Guérot.
Në komunikatë thuhet se Kurti është njohur nga afër me hapësirat dhe veprimtarinë e Institutit Francez si dhe ka falënderuar ambasadorin Guérot për mundësinë e njohjes së qytetarëve të Kosovës me Francën dhe frëngjishten.
Ndërkaq, nëpërmjet një lidhjeje elektronike që është realizuar gjatë vizitës, kryeministri është njoftuar nga profesori francez Christophe Goddard, rreth punës që ai dhe bashkëpunëtorët e tij janë duke bërë në fushën e historisë dhe kërkimeve arkeologjike në Kosovë në kuadër të bashkëpunimit me Universitetin Publik të Prishtinës.
“Instituti Francez në Kosovë, në kuadër të Ambasadës franceze, është një urë e re midis Kosovës dhe Francës, midis gjuhëve tona dhe midis njerëzve tanë” është shprehur Goddard.
Nga ana tjetër, Kurti, mundësinë e mësimit të gjuhës frënge në këtë Institut, e ka cilësuar përparësi shumë të madhe si në raport me artin dhe kulturën ashtu edhe perspektiva profesionale.
“Unë i inkurajojë zyrtarët publikë të shtetit tonë, por edhe studentët dhe profesorët, ndërmarrësit që ta konsiderojnë vizitën në Institutin Francez dhe mësimin e gjuhës frënge këtu, që është një dritare e jashtëzakonshme për kulmin e cilësisë së artit edhe kulturës. Instituti Francez në Kosovë, në kuadër të ambasadës franceze është një urë e re midis Kosovës dhe Francës, midis gjuhëve tona dhe midis njerëzve tanë”, ka thënë kryeministri.
Instituti Francez në Kosovë, si element kyç i bashkëpunimit arsimor dhe kulturor ndërmjet Francës dhe Kosovës, funksionon në kuadër të Ambasadës Franceze, me seli në Prishtinë./teve1.info/
