“I përjetshëm do të jetë kujtimi për Ilaz Kodrën dhe i nderuar vendi i tij në historinë moderne të Kosovës”. U shpreh kështu, kryeministri i vendit, Albin Kurti, në 25 vjetorin nga rënia heroike e komandantit të Ushtrisë Çlirimtare të Kosovës.
Në fjalën e tij hyrëse në seancën e sotme në Kuvend, Kurti e quajti Ilaz Kodrën luftëtar të paepur të lirisë dhe një nga të parët e grupeve të armatosura që u hodhën themelet, e mbi të cilat është ngritur Ushtria Çlirimtare e Kosovës.
“Sot jemi mbledhur në Kuvendin e Kosovës për ta kujtuar 315 dëshmorë dhe martirë të rënë për lirinë e Kosovës para 25 vitesh. Për ta kujtuar luftëtarin të paepur të lirisë, Ilaz Kodrën, bashkëluftëtarin e Adem Jasharit dhe një nga të parët e grupeve të armatosura që u hodhën themelet, e mbi të cilat u ngrit Ushtria Çlirimtare e Kosovës. Ilaz Kodra u aktivizua politikisht qysh në rininë e tij të hershme, duke marrë pjesë në demonstrata popullore, kundër shtypjes politike dhe diskriminimit të shqiptarëve nga pushteti i Serbisë. I përjetshëm do të jetë kujtimi për Ilaz Kodrën dhe i nderuar vendi i tij në historinë moderne të Kosovës”, deklaroi Kurti.
Më tej, kryeministri tha se në gjysmën e dytë të vitit 1997, Ilaz Kodra u angazhua maksimalisht në organizimet e Ushtrisë Çlirimtare të Kosovës.
“Lavdi Ilaz Kodrës, Lavdi dëshmorëve të brigadës 114, lavdi të gjithë 315 të rënëve për lirinë e Kosovës më 13 prill 1999. I kujtofshim përherë”, u shpreh tutje Kurti./teve1.info/.
Me intonimin e himnit të Kosovës dhe atij kombëtar ka nisur seanca e sotme e Kuvendit në nderim të Ilaz Kodrës.
Deputetët mbajtën një minutë heshtje në nderim të rënies së komandantit të UÇK-së, Ilaz Kodra, dhe 315 dëshmorëve e martirëve, të rënë më 30 prill 1999 në Drenicë./teve1.info/.