Kryeministrit në detyrë i Kosovës, Albin Kurti, në margjina të Forumit Ekonomik Botëror, ka zhvilluar takim me Komisioneren e Bashkimit Evropian për Zgjerim, Marta Kos.
Ai në këtë takim ka thënë se asnjë vend i Ballkanit Perëndimor nuk ka qenë më i përgatitur se Kosova në momentin e marrjes së statusit të vendit kandidat, duke kërkuar që progresi i Kosovës të vlerësohet me marrjen e statusit.
“Raporti i Vendit i Komisionit Evropian për vitin 2025 dëshmoi se Kosova ka vazhduar progresin në integrimin evropian. Asnjë vend i Ballkanit Perëndimor nuk ka qenë më i përgatitur në momentin e marrjes së statusit të vendit kandidat, andaj edhe progresi demokratik i Kosovës meriton të vlerësohet me këtë status”, tha Kurti thuhet në komunikatën e qeverisë.
Në takim u diskutua edhe rreth situatës gjeopolitike, Planit të Rritjes, bashkëpunimit rajonal dhe aktualitetit. Sa i përket bashkëpunimit rajonal, kryeministri Kurti theksoi se Kosova luan rol aktiv dhe konstruktiv dhe mbështet integrimin më të gjerë ekonomik të rajonit bazuar në vlerat dhe standardet e Bashkimit Evropian.
Kosova kishte dorëzuar më 15 dhjetor të vitit 2022 aplikimin për anëtarësim në Bashkimin Evropian.
Ky aplikim ende nuk është shqyrtuar./teve1.info/
