Kryeministri në detyrë, Albin Kurti, gjatë një tubimi me elektoratin e Vetëvendosjes në Podujevë, ka renditur disa nga arritjet dhe zotimet kryesore të qeverisjes së tij, duke vënë theksin në arsimin parashkollor, zhvillimin ekonomik dhe lehtësirat për bizneset.
Kurti tha se gjatë mandatit të tij katërvjeçar, Qeveria e Kosovës ka ndërtuar, rinovuar ose përshtatur gjithsej 74 çerdhe në mbarë vendin.
“Gjatë këtij mandate katër vjet e nëntë muaj deri më tani, ne i kemi ndërtuar, rinovuar ose përshtatur 74 çerdhe anë e mbanë Kosovës. Dhe ata para neve për 17 vjet – kanë ndërtuar katër çerdhe. As një çerdhe në mandat nuk e kanë ndërtuar, e ne për vetëm një mandat 74 çerdhe. Kjo tregon se për Qeverinë e Kosovës, me mua kryeministër, fëmijët e Kosovës, janë të gjithë fëmijët e Kosovës. Ndërsa, për ata paraprakisht kanë qenë fëmijët e Kosovës, veç fëmijët e tyre”, tha Kurti.
Ai paralajmëroi gjithashtu se në mandatin e tretë qeveritar do të funksionalizohet Banka Zhvillimore e Kosovës, përmes së cilës do të mbështetet prodhimtaria vendore me 1 miliard euro.
“Të gjithë ato motra e vëllezër që punojnë jashtë vendit e kanë ardhur në vendlindjen e tyre këtu në Podujevë për festat e fund vitit, e sidomos për faktin që sivjet Viti i Ri nis tri ditë më herët, më 28 dhjetor. Viti i Ri nis më herët, por Viti i Ri gjithashtu është viti i mandatit tonë të tretë në të cilin përmes Bankës Zhvillimore do të mbështesim prodhimtarinë me 1 miliard euro. Asnjë ndërmarrës nuk do të ketë më nevojë që për të investuar në prodhim bujqësor, industrial a zejtar ta lë hipotekë tek bankat tokën e vetë stërgjyshore, sepse shteti i Kosovës, do të jetë garanci për ato kredi investive për më shumë prodhimtari në vendin tonë”, tha ai.
Në fjalën e tij, Kurti njoftoi edhe masa lehtësuese për bizneset dhe importuesit, duke theksuar se mbledhja e TVSH-së për mallrat në kufi do të zhvendoset brenda vendit, ndërsa për importin e veturave nga Bashkimi Evropian do të hiqet taksa doganore prej 10 për qind.
“Kjo do të jetë ndihmë e madhe që do ta bëjmë për bizneset e Llapit. Por jo vetëm kaq, që bizneset llapjane të kenë likuditet të shtuar, mbledhjen e TVSH-së për mallra në kufi do të zhvendosim brenda vendit dhe në muajin pasues ashtu siç bjënë bizneset me TVSH-në e brendshme. Ndërkaq, për ata që do të importojnë vetura nga BE, në mandatin tonë të tretë e heqim taksën doganore prej 10 për qind”, deklaroi Kurti.
Në mandatin e ardhshëm, ai tha se nisin me arkat fiskale digjitale, për të hequr barrierën e panevojshme për bizneset, si dhe do jetë fatura elektronike ‘biznes-biznes’, e cila sipas tij, mundëson mbikëqyrjen në kohë reale të detyrimeve të tatimeve mbi vlerën e shtuar si dhe ri-mburësimin automatik të TVSH-së.
Po ashtu , Kurti duke shpalosur programin e partisë së tij para simpatizantëve në Llap, tha se do të ketë transport publik, urban e ndër urban – publik anë e mbanë me biletë të integruar me vetëm 10 euro në muaj për të qarkulluar qytetarët në gjithë vendin.
