Kryeministri i Kosovës, Albin Kurti, i shoqëruar edhe nga ministri i Shëndetësisë, Arben Vitia, gjatës ditës së sotme vizituan Klinikën Gjinekologjike Obstetrike.
Kurti nga afër pa punimet në kuadër të renovimeve në katër reparte të kësaj Klinike që mbulojnë nga gjithsej 13 reparte.
Këto renovime që mbulojnë një hapësirë prej 5000m2, përfshijnë korridoret, dhomat, shtretërit.
Kurti gjatë takimit me mantilbardhët i quajti heronj të heshtur të gjallë, të cilëve edhe iu shprehu falënderime dhe mirënjohje për përkushtim dhe angazhim.
“Le ta shfrytëzojmë këtë vizitë që t’ua kthejmë një pjesë të vogël të borxhit të pamatshëm që në parim është i pakthyeshëm. Faleminderit në fund për atë që është më e rëndësishmja për kontributin, përkushtimin, punën, angazhimin që e bëni jo vetëm përditë e për çdo orë, por mbase për çdo minutë e për çdo sekondë, sepse këtu lind jeta edhe momentet fare të shkurtra bëhen vendimtare”, tha Kurti.
Ndërkaq, Vitia është shprehur i lumtur që po përfundojnë punët, të cilat janë dukur të pamundshme.
“Jam i lumtur që pas këtyre renovimeve kushtet e juaja dhe potenciali i juaj për të dhënë shërbime sa më të mira për pacientet tona do të jetë në një nivel tjetër”, tha ai.
