Kryeministri në detyrë, Albin Kurti, ka përkujtuar 27-vjetorin e Masakrës së Studimes, duke theksuar se krimet e kryera nga Serbia nuk mund të harrohen dhe as të falen.
Ai rikujtoi se më 2 maj 1999, në fshatin Studime të Vushtrris, brenda vetëm dy orësh u vranë 116 civilë shqiptarë, gjatë kulmit të fushatës së spastrimit etnik. Sipas tij, shumë nga trupat e viktimave u zbuluan pas luftës në varreza masive.
Kurti ka theksuar se, pavarësisht përmasës së krimit, drejtësia vendore dhe ndërkombëtare kanë dhënë shumë pak dënime. Ai përmendi rastin e Vlastimir Gjorgjeviqit, i dënuar nga Tribunali i Hagës për krime ndaj shqiptarëve, si dhe dënimin e Zoran Vukotiqit në qershor 2025 me 15 vjet burg për krime lufte që përfshijnë edhe Studimen.
Sipas tij, këto vendime nuk janë të mjaftueshme për të reflektuar dhimbjen e familjeve të viktimave dhe përmasën e krimeve të kryera.
