Kurti ka theksuar se në Kosovë janë 1 mijë e 600 persona të zhdukur me dhunë gjatë luftës në Kosovë.
Tutje kryeministri ka thënë se 23 vjet pas përfundimit të luftës, Serbia as nuk kërkon falje dhe nuk i pranon krimet e veta në Kosovë
“Sot ende i kemi mbi 1600 persona të zhdukur me dhunë gjatë luftës, 12 mijë civil të paarmatosur janë vrarë, mbi 10 përqind të tyre fëmijë dhe ende nuk ka drejtësi për të gjitha këto mizori. 23 vjet pas përfundimit të luftës, fqinji jonë verior as nuk kërkon falje, as nuk do që t’i kuptojë e t’i pranojë përmasat e krimeve të veta në Kosovë. Në vend që të hap arkivat shtetërore që do të mund të ndriçonin fatin e të zhdukurve me dhunë dhe të zbuloheshin ekzekutorët e krimeve, pushtetarët e Serbisë arsyetojnë veprimet gjenocidiale të Millosheviqit dhe fajësojnë NATO-n për bombardimeve. Pas agresionit rus në Ukrainë, së bashku me Rusinë po e keqinterpretojnë edhe ndërhyrjen e NATO-s në Kosovë, duke aluduar në ngjashmëri të rasteve si përpjekje për ta justifikuar imprealizimin dhe aspiratat e tyre hegjemoniste”, tha Kurti.
Kurti ka theksuar se NATO në Kosovë ka ndërhyrë për arsye e me qëllime humanitare, raporton teve1.info
“ NATO ndërhyri në Kosovë për arsye e me qëllime humanitare, për të shpëtuar një popull nga shfarosja. Ishte ndërhyrje legjitime për shkak se Millosheviqi nuk shprehte gatishmëri për të përmbushur kërkesat dhe detyrimet që buronin nga rezolutat e miratuara në OKB dhe as nuk hiqte dorë nga operacionet ushtarake dhe nga politika e spastrimit etnik në Kosovë “, tha Kurti.
“Ku është NATO, ku e keni NATO-n, ishin disa prej frazave më të përsëritura nga ushtarët dhe policët serb gjatë dëbimit dhe masakrave hakmarrëse të tyre mbi shqiptarët në Kosovë në pranverën e vitit 1999. NATO është këtu në Kosovë për sigurinë tonë, bashkë me vajzat dhe djemtë e FSK-së, të gatshëm për ta mbrojtur sovranitetin e vendit në çdo rrezik a cenim eventual…Sot bartës të asaj trashëgimie politike vazhdojnë ta udhëheqin Serbinë bashkë me synimet e tyre ndaj Kosovës e me lidhjet e tyre me Rusinë. Në këtë pikë Kosova mbetet e lidhur me fort me Shtetet e Bashkuara të Amerikës dhe aleatët e saj, ndërkohë që ka maksimalizuar përpjekjet për anëtarësim në NATO“, shtoi ai.
