Kryeministri në detyrë i Kosovës, Albin Kurti, ka mirëpritur në takim ambasadorin e ri të Republikës Federale të Gjermanisë në Kosovë, Rainer Rudolph, të cilin e ka përgëzuar për emërimin në këtë detyrë të rëndësishme diplomatike.
Gjatë takimit, Kurti ka vlerësuar përvojën dhe ekspertizën që ambasadori Rudolph sjell me vete, duke theksuar rëndësinë e partneritetit të fortë dhe gjithëpërfshirës ndërmjet Kosovës dhe Gjermanisë – një partneritet që përfshin mbështetje politike, ekonomike dhe në fushën e sigurisë.
“Gjermania është një nga partnerët më të qëndrueshëm dhe strategjikë të Kosovës, me mbi 450 milionë euro bashkëpunim financiar dhe mbi 95 milionë euro bashkëpunim teknik në zbatim. Ndër projektet më përfaqësuese është Parku i Inovacionit dhe Trajnimeve në Prizren, i cili po bëhet një qendër rajonale për teknologji të gjelbër dhe zhvillim të aftësive”, thuhet në komunikatën për media të Zyrës së Kryeministrit.
Gjatë bisedës, u veçua edhe roli i rëndësishëm i mërgatës kosovare në Gjermani, e cila përbëhet nga mbi 600 mijë qytetarë që shërbejnë si një urë e fuqishme shoqërore dhe ekonomike mes dy vendeve.
“Kryeministri falënderoi ambasadorin për mbështetjen gjermane në fushat e arsimit profesional, integrimit në tregun e punës, shtetit të së drejtës, tranzicionit të gjelbër dhe reformave infrastrukturore, duke theksuar se këto fusha përkojnë me prioritetet e Qeverisë dhe me progresin e bërë në vitet e fundit”, theksohet në komunikatë.
Kurti falënderoi ambasadorin për mbështetjen e vazhdueshme të Gjermanisë në fusha si arsimi profesional, integrimi në tregun e punës, shteti i së drejtës, tranzicioni i gjelbër dhe reformat infrastrukturore fusha këto që siç thuhet përputhen me prioritetet e Qeverisë dhe me progresin e arritur gjatë viteve të fundit.
Në aspektin ekonomik, Kurti ka shprehur gatishmërinë e Kosovës për të thelluar bashkëpunimin dhe për të nxitur rritjen e investimeve gjermane në sektorë kyç si prodhimi, edukimi dual, energjia e ripërtëritshme dhe teknologjia digjitale.
Në përmbyllje të takimit, ai ka shprehur mirënjohje për kontributin e kontingjentit gjerman në kuadër të KFOR-it dhe NALT-it, duke theksuar se:
“Gjermania mbetet një faktor kyç në ruajtjen e paqes dhe stabilitetit në Kosovë dhe në të gjithë rajonin, përmes pranisë së saj në KFOR dhe mbështetjes në fushën e sigurisë.”/teve1.info/
